نصائح وارشادات عامة علشان تقدر تخليك تعدي أي انترفيو في شركة كبيرة باذن الله
أول مرحلة : مرحلة الفلترة (CV Filtering):
حاول تصغير الcv بتاعتك على قد ماتقدر , علشان لو انت ماليه بيانات وحاجات وخبرات حشو وخلاص وبقا صفحات كثير مش هتفرق مع معاهم ومحدش هيقرأ “Nobody Reads” خليه صفحة واحدة فيها الحاجات الأساسية والمهمة والمختصرة وبالذات الحاجة اللي انت فخور انك عملتها اللي ممكن تجذب نظرهم وتخليه يعرفوا انك مؤهل. اعمل حسابك دايما ان اللي بيقرا الCV بيقراها في ثواني , اقل من دقيقة فا إزاي تجذب عينه بقا للحاجات المهمة بس.
وحصل معايا فعلا ان وانا داخل اعمل انترفيو في اكتر من مكان انه بيفتح الـCVبتاعتي تاني ويمرر عينه عليها بسرعة في ثواني.
ناس كثير او معظم الناس حتى بتقف في المرحلة دي ومبتعديش للمرحلة اللي بعدها بسبب الصفحات والكلام الكثير اللي محدش هيقراها وهيـ Scroll ويروح للي بعده.
لينك مفيد لل Template بتاع ال CV هنا.
ثاني مرحلة:
المراحل اللي بعد كده بتختلف من مكان لمكان بس في الغالب يعني او المجمل ثاني مرحلة ممكن تكون أسئلة برمجية في الـ Problem Solving يشوف هتقدر تحل الحاجات دي وهل انت كاتب كود سليم وقوي ولا سباجتي كود وحاجة مشي حالك , الموقع الاونلاين هو اللي بيختبر وبيبعتلهم النتائج وفي الغالب مبتكونش متحدده لغة معينة يعني تشتغل باللي انت عايزه مش هتفرق c/c++ , C# , Java , Python , js.
لو حليت الحاجات صح هيردو عليك انك اتاهلت للمرحلة اللي بعدها وهنعرف اللي هيحصل فيها.
الى هنا وصلت في Twitter 😳
ثالث مرحلة:
بعد ماتنجح في المرحلة اللي فاتت المسؤول عن التوظيف هيكلمك موبايل بعد تحديد معاك على الايميل طبعاً, مرحلة الموبايل انترفيو ممكن تتكرر في اكتر من وقت, على كل حاجة , هيتعرف عليك ويتناقش معاك ويسألك أسئلة عامة ممكن تكون عنك وشخصيتك وطباعك علشان يحدد هل انت اجتماعي ومناسب ولا شخصي منعزل وسلبي ومش مناسب ليهم وممكن يكون في شوية أسئلة تكنيكال بس مش هيكون متعمق قوي يعني لانه مش متخصص.
رابع مرحلة:
اكتر مرحلة ممتعة وفيها تحدي وانا شايفها انه اهم واحدة وهي مرحلة ال Live Coding
واحد متخصص بيكون غالباً من الفريق اللي طالب مهندسين معاه بيديك كام سؤال تكنيكال بتحلهم على الeditor قدامه لو انت لسه بادئ بتكون معظم الأسئلة في ال Data Structures ولو عندك خبرة بيكون التركيز اكثر في السؤال عن مراحل متقدمة في البرمجةو ال Distributed Systems وهقلك دلوقتي على كام Trickـايه هتساعدك جدا انك تظهر بصورة كويسة وتحاول توصل للهدف من المرحلة دي كلها:
بص ياسيدي
- – وهو بيطلب منك السؤال حاول تعرف منه التفاصيل كلها , هل فيه حالات خاصة , هل هل ,تعرف كل نقطة علشان تقدر تكون فكرة عن اللي هو عايزه بالظبط.
- – وانت بتحل فكر بصوت عالي علشان تعرفه أسلوب وطريقة تفكيري اوعى تسكت او تكتب وخلاص .
- – اسأله كثير وانت بتفكر مثلا تقله ايه رايك استخدم كذا او استخدم الأسلوب الفلاني , هو اكيد هيساعدك علشان احنا مش في لجنة امتحان وهو مراقب عايز يسقطك , هو عايز يقيس مستواك ومدى كفاءتك واسلوبك البرمجي وازاي بتفكر.
- – حاول دايما قبل ماتبدا في الكود تبسط المتطلبات في ورقة فاضية او على الشاشة في برنامج مساعد هتوفر عليك وقت ولخبطة ساعت كتابة الكود.
- –دايما او في الغالب يعني الأسئلة او المشاكل اللي هتتعرض عليك هتخلص جزء كبير منها بس مش كلها بسبب انها بتحتاج وقت اكبر , ودي مش مشكلة حاول تخلص الجزء اللي تقدر عليه وتبين انك فعلا فاهم وواثق من نفسك عارف انت بتعمل ايه وعارف تحل المشكلة مش واقف وتايه.
- – حاول تتناقش معاه لو جه في بالك كذا طريقة حل للمشكلة اللي هو عرضها عليك مثلا انا ممكن اعملها بطريقة كذا وهتبقى بسيطة بس هتاخد خطوات طويلة ومش هتكون عملية وفي طريقة تانية عملية بس مركبة , اعمل بانهي طريقة هو هيقلك مثلا انا عايز الأولى او الثانية او اعمل الاثنين.
أخيراً:
حاجات المفروض تراجعها قبل الانترفيو
-Data Structures & Algorithms المشهورة
زي LinkedList , Stack , Queue , Tree, Binary Search Tree, Hash
و Bubble , Selection , Insertion , Heap ,Quick, Merge Sort , Binary Search
تراجع على الBig O Notation وتكون قادر انك تحسب ال Complexity بتاعت أي معادلة او دالة .
كتاب Cracking The Code Interview حاول تحل كل الحاجات اللي فيه هيساعدك ويديك فكرة عن نوع الأسئلة اللي ممكن تتسئلها.
كمان كتاب Programming Interviews Exposed: Secrets to Landing Your Next Job.
مواقع ممكن تساعد:
اي موقع فيه مسائل Problem Solving:
Codeforces
CodeFights
etc….
+
https://www.interviewcake.com/
https://www.careercup.com/
https://www.hackerrank.com/domains/algorithms/warmup
بالتوفيق ان شاء الله
واتمنى اكون كتبت حاجة مفيدة
